Analisti politik, Xhevdet Pozhari, ka deklaruar se presidenti i Serbisë Aleksandar Vuçiq doli me “veshët ulur poshtë” nga takimi i së martës në Bruksel me shefen e re të diplomacisë së Bashkimit Evropian.
Sipas Pozharit gjatë këtij takimi Kallas i ka kërkuar Vuçiqit zgjidhje të sulmit në Banjskë dhe vendosje të sanksioneve ndaj Rusisë.
Ai në emisionin “Këndi i Debatit”, në Tëvë1 ka shtuar se ndaj Serbisë është duke u ulur doza e tolerancës.
“Kërkesat kanë qenë shumë të qarta, në rradhë të parë zgjidhja e sulmit në Banjskë dhe e dyta vendosja e sanksioneve ndaj Rusisë. Definitivisht që është duke u ulur doza e tolerancës në atë që e kemi diskutuar shpeshherë në studio ndaj Serbisë veçanërisht kur është dëshmuar se me politika të tilla të Bashkimit Evropian vetëm sa është trimëruar për veprime që janë karakterit terrorist dhe po ndodhin njëra pas tjetrës. Pra absolutisht ky është një moment shumë i rëndësishëm për shtetin e Kosovës, e kuptoj edhe optimizmin e Kurtit, kësaj rradhe është kërkuar ajo që është thënë zëshëm që ndaj Serbisë të bëhet një presion më i madh dhe nga ky takim Vuçiq doli me veshët e ulur poshtë”, është shprehur ai.
Të martën në Bruksel shefja e re e diplomacisë së Bashkimit Evropian, Kaja Kallas, ka zhvilluar takime të ndara me krerët e Kosovës dhe Serbisë me të cilët ka biseduar për dialogun për normalizimin e raporteve mes dy vendeve, për sulmin në Banjskë dhe shpërthimin në kanalin e Ibër-Lepencit në Zubin Potok.
Takimet nuk ishin në kuadër të dialogut për normalizimin e raporteve mes Prishtinës dhe Beogradit, që ndërmjetësohet nga blloku evropian./teve1.info/
