Portieri i skuadrës së Prishtinës, Altin Gjokaj do të grumbullohet me Kombëtaren e Kosovës për ndeshjen miqësore me Andorrën.
Federata e Futbollit të Kosovës (FFK), ka njoftuar të enjten se selektori Franco Foda ka ftuar portierin Gjokaj, i cili është pjesë e Kombëtares U21 në vend të Arijanet Muriqit.
Muriq kishte pësuar lëndim muskulor në stërvitjen e së mërkurës dhe nuk do të rrezikohet për miqësoren kundër Andorrës, e cila luhet të dielën mbrëma në Prishtinë.
“Në pamundësi që ekipit t’i bashkohet portieri Faton Maloku, i cili ishte në listën rezervë, përzgjedhësi Franco Foda, ka vendosur ta ftojë portierin e Kombëtares U21, Altin Gjokaj, i cili do t’i bashkohet Kombëtares A dhe do të jetë pjesë e saj deri në përfundim të këtij grumbullimi. Gjokaj konsiderohet një prej portierëve më premtues të gjeneratës së re dhe kjo ftesë paraqet një mundësi të rëndësishme për të fituar përvojë pranë ekipit kombëtar A”, thuhet në njoftimin e FFK.
Miqësorja me Andorrën është e dyta për Kosovën pas asaj javën e shkuar me Çekinë, të cilën e humbi në Pragë me rezultat 2:1.
Dueli Kosovë – Andorrë në stadiumin “Fadil Vokrri” nis nga ora 20:00.
