Një grua në fshatin Poslishtë të Prizrenit ka kërkuar ndihmën e Policisë së Kosovës në orët e hershme të mëngjesit, pasi ishte sulmuar fizikisht nga bashkëshorti i saj.
Sipas Policisë, menjëherë pas mbërritjes në vendngjarje, zyrtarët policorë janë përballur me rezistencë të dhunshme nga bashkëshorti i viktimës, vëllai dhe babai i tij, të cilët jo vetëm që sulmuan policinë, por tentuan edhe ta sulmojnë sërish viktimën.
“Më datë 19.01.2026, rreth orës 02:12, në fshatin Poslishtë, Prizren, një grua ka kërkuar ndihmën e policisë pasi ishte sulmuar fizikisht nga bashkëshorti i saj. Menjëherë pas mbërritjes në vendngjarje, patrullat policore janë përballur me një situatë të rëndë, ku bashkëshorti i viktimës, vëllai dhe babai i tij kanë sulmuar zyrtarët policorë dhe kanë tentuar të sulmojnë përsëri viktimën”, thuhet në njoftimin e Policisë.
Policia bën të ditur se gjatë konfrontimit, zyrtarët policorë janë sulmuar fizikisht dhe me gurë, ndërsa viktima është kërcënuar dhe rrezikuar seriozisht, çka ka detyruar policinë të ndërhyjë me forcë për ta vënë situatën nën kontroll.
“Për të parandaluar sulmin dhe për të mbrojtur jetën e viktimës, policët kanë ndërhyrë me forcë, duke arritur ta vendosin situatën nën kontroll”, thuhet më tej në njoftim.
Gjatë përleshjes, disa zyrtarë policorë kanë pësuar lëndime të lehta dhe kanë marrë trajtim mjekësor.
Tre të dyshuarit janë arrestuar dhe, me vendim të prokurorit, janë dërguar në ndalim për 48 orë, ndërsa hetimet për rastin janë duke vazhduar.
