Policia e Kosovës ka publikuar sot fotografitë e dy personave të dyshuar për veprën penale “Shpërdorim i pasurisë së huaj” dhe ka kërkuar ndihmën e qytetarëve për identifikimin dhe lokalizimin e tyre.
Rasti dyshohet të ketë ndodhur më 25 korrik të vitit të kaluar, rreth orës 12:00, në fshatin Jezerc të Ferizajt.
Sipas njoftimit të Policisë Rajonale të Ferizajt, kjo kërkesë është bërë me autorizim të Prokurorisë Themelore në Ferizaj dhe ka për qëllim kapjen e personave të dyshuar, të cilët deri më tani nuk janë identifikuar.
“Policia Rajonale e Ferizajt, në bazë të autorizimit nga Prokuroria Themelore në Ferizaj për publikimin e fotografive të personave në kërkim, lëshon kërkesë për bashkëpunim me qytetarët, me qëllim identifikimin, vendndodhjen dhe kapjen e personave të dyshuar. Dyshohet se më datën 25.07.2024, rreth orës 12:00, në fshatin Jezerc – Ferizaj, personat e dyshuar kanë kryer veprën penale ‘Shpërdorim i pasurisë së huaj’. Deri më tani, të dyshuarit nuk janë identifikuar”, thuhet në njoftimin e policisë.
Policia u bën thirrje qytetarëve që kushdo që ka informacione rreth identitetit apo vendndodhjes së tyre, të kontaktojë:
- stacionin më të afërt të policisë,
- përmes aplikacionit “Lajmëro Policinë”,
- apo përmes numrave: 192, 0290/326-250 dhe 0290/322-406.
Të gjitha informacionet që do të ofrohen nga qytetarët do të trajtohen me konfidencialitet të plotë.
