Njësitet e Trafikut Rajonal në Prizren kanë ndërmarrë masa të rrepta ndaj disa drejtuesve të automjeteve që kanë tejkaluar ndjeshëm kufirin e lejuar të shpejtësisë.
Sipas Policisë, gjatë datave 29 dhe 31 tetor 2025, njësitet policore, përmes veturave inteligjente, radarëve mobil dhe radarëve statik, kanë identifikuar disa shoferë që kanë vozitur me shpejtësi shumë më të lartë se kufiri i lejuar në zonën 50 km/h.
Gjatë kontrolleve janë regjistruar raste të shpejtësive prej 104 km/h, 107 km/h dhe 140 km/h.
Pas ndalimit të automjeteve, ndaj personave të përfshirë janë ndërmarrë masat ligjore përkatëse:
• Dy shoferë janë ndëshkuar me gjobë prej 500 euro, 5 pikë negative dhe ndalim të drejtimit të automjetit për 6 muaj;
• Një shofer është ndëshkuar me gjobë prej 300 euro, 3 pikë negative dhe ndalim të drejtimit të automjetit për 3 muaj.
Në fund, Policia e Kosovës ka apeluar tek të gjithë ngasësit e automjeteve që të respektojnë kufizimet e shpejtësisë dhe rregullat e komunikacionit, në mënyrë që të rritet siguria rrugore dhe të parandalohet humbja e jetëve njerëzore.
