Policia e Kosovës ka bërë të ditur se të dielën është sekuestruar një sasi e cigareve në Aeroportin “Adem Jashari” në Prishtinë.
Cigaret janë gjetur në valixhet e një shtetase të Shqipërisë që po udhëtonte për në Londër.
Asaj cigaret i janë gjetur në çantën e krahut dhe pas kontrollit edhe në valixhen të cilën e kishte dorëzuar në check-in në aeroport
“E njëjta është kontrolluar nga ana e zyrtarëve të X-Rey në prezencë të zyrtarëve kompetentë, ku në bazë të aparatit të kontrollit është detektuar se në çantën e krahut ka një sasi të konsiderueshme të pakove me cigare. Udhëtarja femër shtetase nga Shqipëria, dyshohej se përpos çantës së krahut që kishte me vete, ajo në check-in në aeroport, kishte dorëzuar edhe një valixhe në të cilën dyshohej se posedonte po ashtu pako me cigare”, thuhet nga Policia e Kosovës.
Udhëtarja e ndalur është dërguar në zyrën e doganës për të vazhduar me procedurat e mëtejme,ku pas kontrollit edhe të valixhes së dorëzuar në check-in, e njëjta ka rezultuar se posedon pako me cigare.
“Pas kontrollit janë sekuestruar gjithsej 104 boksa (shteka) cigare “Malboro e kaltër” dhe 20 boksa “Karelia Slims” me banderola të shtetit të Shqipërisë, të cilat ishin të padeklaruara në Doganën e Republikës së Kosovë”, thuhet tutje
Pakot e cigareve janë sekuestruar dhe rasti i është dorëzuar Doganës së Kosovës për veprime të mëtejme sipas procedurave të parapara ligjore.
