Policia holandeze ka bërë të ditur se dy protestues janë arrestuar dhe një zyrtar policor është lënduar lehtë gjatë protestës së mbajtur të mërkurën në Hagë.
Sipas policisë, rreth orës 12:00 pati një periudhë të shkurtër trazirash, pasi një grup protestuesish u nis në drejtim të Raamwegut, ku ndodhen Dhomat e Specializuara të Kosovës, pa pasur leje për të marshuar në atë drejtim.
Policia njoftoi se Njësia Mobile formoi një kordon për të bllokuar qasjen drejt Raamwegut.
Kur një pjesë e protestuesve u kthye në drejtim të policisë, njësia ndërhyri për t’i shpërndarë, duke përdorur për një kohë të shkurtër topin e ujit dhe sprejin.
“Njësia Mobile formoi kordon për ta bllokuar qasjen drejt Raamwegut. Kur një pjesë e protestuesve u kthye kundër policisë, Njësia Mobile ndërhyri për të kryer një operacion për shpërndarjen e tyre dhe për një kohë të shkurtër përdori topin e ujit. U përdor edhe sprej. Falë ndërhyrjes së shpejtë dhe të vendosur, rendi u rivendos brenda një kohe të shkurtër”, thuhet në njoftim.
Sipas autoriteteve holandeze, gjatë përballjes në Raamweg, disa protestues përdorën dhunë ndaj zyrtarëve policorë dhe pajisjeve të policisë.
Si pasojë, një polic pësoi lëndime të lehta.
Policia ka konfirmuar arrestimin e dy personave, të dyshuar për vandalizëm.
“Gjatë përballjes me një grup protestuesish në Raamweg, disa protestues përdorën dhunë ndaj zyrtarëve policorë dhe pajisjeve të policisë. Një zyrtar policor pësoi lëndime të lehta. Dy persona u arrestuan, të dy për vandalizëm”, theksohet në njoftimin e Policisë holandeze./teve1.info/
