Policia e Kosovës ka njoftuar se është shpëtuar një qytetar i cili ishte rrokullisur me traktor në Bellobërdë të Leposaviqit, raporton teve1.info
Sipas komunikatës së Policisë, së bashku me qytetarët, pjesëtarët policorë derisa ishin në patrullim, kanë intervenuar që ta largojnë traktorin dhe ta nxjerrin personin që kishte pësuar aksident.
“Policia e Kosovës, së bashku me disa qytetarë, ndihmojnë një person që ishte rrokullisur me traktor.
Me datën 14.03.2023, rreth orës 18:20, një njësi policore derisa ishte në patrullim në fshatin Bellobërdë komuna e Leposaviqit, kanë hasur në një vet-aksident, ku një qytetar ishte rrokullisur me traktorin e tij duke mbetur nën traktor dhe jeta e tij ishte seriozisht e rrezikuar.
Zyrtarët policorë menjëherë kanë intervenuar dhe me ndihmën e disa qytetarëve kanë arritur që ta largojnë traktorin dhe ta nxjerrin personin që kishte pësuar aksident. Personi ka marrë tretman mjekësor dhe gjendja shëndetësore e tij është e mirë.
Policia e Kosovës apelon tek të gjithë pjesëmarrësit në komunikacion të kenë kujdes të shtuar, veçanërisht në këto kushte atmosferike”, thuhet në komunikatë.
