Kandidati i Lëvizjes Vetëvendosje për deputet, Nezir Kraki, ka deklaruar se paraqitja e një vajze të mitur në skenë gjatë një tubimi zgjedhor të dielën, ku ishte i pranishëm kryeministri në detyrë Albin Kurti, ka qenë keqkuptim dhe jo pjesë e një skenari të organizuar.
Në emisionin “Këndi i Debatit” në Tëvë1, Kraki ka thënë se rasti ka ndodhur spontanisht, kur një prind ka kërkuar që vajza e tij të bënte një foto me kryeministrin, por më pas ajo ka përfunduar në skenë.
“Ajo me fëmijën ka qenë një keqkuptim. Edhe unë isha atë ditë me Kurtin në Zyrih dhe erdhi një prind me një vajzë 10-vjeçare me një vizatim dhe më tha: ‘Krak, a ka mundësi që vajza të bëjë një foto me kryeministrin?’. Unë u thashë të kalojnë nga sigurimi, dhe më pas ajo ka dalë në skenë me kryeministrin, siç e keni parë”, ka sqaruar Kraki.
Ai ka theksuar se kryeministri nuk mund të mbahet përgjegjës për veprimet e përkrahësve në tubime, duke shtuar se deklaratat apo sjelljet individuale nuk përfaqësojnë subjektin politik apo udhëheqësit e tij.
Kraki gjithashtu ka kritikuar përmbajtjen e asaj që u prezantua si poezi nga e mitura, duke thënë se nuk është e përshtatshme që një fëmijë të përdorë gjuhë të tillë, por përsëriti se rasti nuk ka qenë i inskenuar.
“Nuk mund ta bësh përgjegjës kryeministrin Kurti. E pashë edhe tekstin e asaj që pretendohej si poezi, nuk ishte poezi dhe nuk duhet që një fëmijë të thotë ato fjalë, sepse janë tepër brutale. Ajo gjë nuk ka qenë skenar. Çfarë thotë apo deklaron një përkrahës në tubim është e atij; për 30 apo 40 mijë njerëz nuk mund të jem unë përgjegjës për të gjithë”, ka përfunduar ai.
Ndryshe, të dielën, në tubimin e Lëvizjes Vetëvendosje në Vushtrri, me ftesë të kryeministrit në detyrë, Albin Kurti, në skenë është ngjitur një fëmijë, i cili ka recituar një poezi me përmbajtje politike dhe më pas ka nxitur brohoritjet në sallë në mbështetje të Kurtit.
Nga ky segment i tubimit janë shkëputur dhe shpërndarë gjerësisht në rrjetet sociale video të ndryshme, shumica prej tyre me karakter tallës.
Për tubimin e Vetëvendosjes në Vushtrri, ankesë në Panelin Zgjedhor për Ankesa dhe Parashtresa kanë dërguar Instituti i Kosovës për Drejtësi dhe Lidhja Demokratike.
Rregullorja e KQZ-së për Fushatën Zgjedhore ndalon angazhimin dhe pjesëmarrjen në fushatë të fëmijëve nën moshën 15-vjeçare./teve1.info/
