Qytetarët në veri të Mitrovicës, po shpresojnë që së shpejti do të normalizohen marrëdhëniet mes Kosovës dhe Serbisë.
Prandaj, disa prej tyre e kanë mirëpritur propozimin evropian.
Faik Haziri, i cili jeton në Lagjen e Boshnjakëve në Veri, ka një kërkesë për përfaqësuesit politik në Kosovë.
Ndërsa, Zhirovat Georgeviq, thotë se qytetarët nuk kanë asgjë në dorë, vetëm po bëhen pjesë e lojërave politike.
“Marrëveshja që është arritur është çështje e politikanëve. Pak na takon neve të flasim dhe të ndikojmë në diçka që tashmë është darkorduar. Do të ishim më të lumtur sikur të mos kishte fare marrëveshje dhe ne do ndërtojmë raportet tona pa pasur nevojë për këta politikanë. Nuk do të lëshohesha në detaje të kësaj marrëveshjeje sepse ne njerëzit e thjeshtë nuk do të kuptojmë kurrë as se si erdhi deri te marrëveshja. Ne jemi të gjykuar, si serbët ashtu edhe shqiptarët, nuk mund të tregtojmë mes vete, politikanët po bëjnë këso lojëra dhe çmimin do ta paguajë populli, si shqiptarët, ashtu edhe serbët”, deklaroi Georgeviq.
Ka dhe nga ta që thonë se komuniteti serb po favorizohet me këtë marrëveshje.
Disave nuk iu intereson fare procesi i dialogut.
“Mua nuk më intereson fare se çfarë marrëveshje janë arritur”, tha një qytetar.
Ndërkaq, drejtoresha ekzekutive e organizatës New Social Initiative, Jovana Radosavljeviq, vë në pikëpyetje se në çfarë forme do të zbatohen këto marrëveshje, veçanërisht Asociacioni i Komunave me shumicë serbe.
“Mendoj se mungojnë disa çështje thelbësore në dokumentin e prezantuar nga Bashkimi Evropian. E para është se nuk tregohet se si do të implementohen këto marrëveshje mes Kosovës dhe Serbisë. Ka pajtim për disa gjëra, por ka edhe shumë pikëpyetje. Ndërkaq, sa i përket pikës 7-të, mendoj se po flitet për diçka më shumë se formimi i Asociacionit të Komunave me shumicë serbe. Por e përsëris ka ende shumë paqartësi se në çfarë forme do të zbatohen këto marrëveshje”, tha Radosavljeviq.
Kurse, Profesori Nexhmedin Spahiu, thotë se përmes kësaj marrëveshje Serbia de fakto dhe de jure e ka pranuar pavarësinë e Kosovës.
Në takimin e fundit presidenti serb, Aleksandar Vuçiq ka refuzuar ta nënshkruaj marrëveshjen pavarësisht se e ka pranuar.
Kronika e gazetarit Shpat Blakçori.
