Deputetja e zgjedhur nga Lidhja Demokratike e Kosovës, Hykmete Bajrami, ka kërkuar që të gjithë qytetarët të sigurohen se vota e tyre do të respektohet, duke kërkuar rinumërim të plotë të votave në gjithë Kosovën.
“Është e domosdoshme që institucionet e drejtësisë të reagojnë menjëherë. Kushdo që ka manipuluar votat duhet të përgjigjet para ligjit dhe para qytetarëve,” ka theksuar Bajrami.
Ajo ka publikuar edhe nenin 216 të Kodit Penal, i cili parashikon se personi që shton, heq ose fshin votat ose nënshkrimet dënohet me 1 deri në 3 vjet burgim. Në rast se kjo vepër penale kryhet nga një anëtar i Komisionit Qendror të Zgjedhjeve ose një person në keqpërdorim të detyrës zyrtare, dënimi mund të shkojë deri në 5 vjet burg.
Bajrami thekson se rinumërimi i votave është i domosdoshëm për të rikthyer besimin e qytetarëve në integritetin e procesit zgjedhor dhe për të parandaluar çdo abuzim me vullnetin e tyre. /teve1.info/
