Një 41-vjeçar është plagosur me thikë në Qerret të Katundit të Ri në Durrës pasditen e kësaj të mërkure.
I plagosuri, është dërguar me urgjencë në spitalin e Durrësit, ndërsa sipas informacioneve paraprake nga grupi hetimor, 41-vjeçari dyshohet të jetë goditur gjatë një konflikti për motive të dobëta.
Po ashtu mësohet se viktima ka qenë i përfshirë edhe më herët në situata problematike.
Ai është futur menjëherë në sallën e operacionit në Spitalin e Durrësit ndërsa autori i dyshuar i plagosjes është shpallur në kërkim.
Njoftimi i policisë
“Rreth orës 16:50, në fshatin Qerret, dyshohet se gjatë një konflikti për motive të dobëta, shtetasi E. S. ka plagosur me mjet prerës (thikë) shtetasin H. Sh., 41 vjeç, i cili ndodhet në spital, nën kujdesin e mjekëve, jashtë rrezikut për jetën.
Shërbimet e Policisë po punojnë intensivisht për kapjen e autorit ndërsa grupi hetimor, në drejtimin e Prokurorisë, vijon punën për zbardhjen e rrethanave të ngjarjes”, njofton policia./Euronews.al
