Policia e Kosovës ka njoftuar se në dy raste të ndara të enjten janë arrestuar pesë persona nga hetuesit e krimeve ekonomike.
Sipas njoftimit në rastin e parë janë arrestuar N.G., F.M. dhe I.K., të cilët dyshohet se si zyrtarë të Federatës se Karatesë të Kosovës kanë keqpërdorur mjetet financiare të Ministrisë së Kulturës, Rinisë dhe Sportit (MKRS), duke shkaktuar dëme në vlerë prej 87.430 eurove.
Ndaj tyre është iniciuar rasti “mashtrim me subvencione”
Ndërkaq, në rastin e dytë është arrestuar A.M. i cili dyshohet se në cilësi të kryetarit të Komisionit për Ndarjen e Grandeve, në komunën e Obiliqit, ka ndarë subvencion në vlerë 9.900 eurove për një klub basketbolli jo aktiv.
Po ashtu në rastin e dytë është arrestuar edhe A.A. e cila dyshohet se si monitoruese e implementimit të subvencioneve, ka përpiluar raport të rrejshëm.
Mbi bazën e gjetjeve është krijuar dyshimi se të dyshuarit kanë kryer veprat penale “keqpërdorim i pozitës apo autoritetit zyrtar’ dhe ‘konflikti i interesit’.
