Rezultatin e partisë së tij, e prezantoi në këtë mënyrë posa u mbyllen vendvotimet.
Por, nga e gjithë kjo, Lumir Abdixhiku, e qëlloi vetëm numrin e ulëseve që do t’i ketë LDK në legjislaturën e ardhshme.
Kjo meqë pas numrit të votave, LDK nga 18 ra në 16%.
Kësisoj, edhe në këto zgjedhje, partia më e vjetër në Kosovë, mbeti e treta.
E kjo bëri, që në pah të dalin sërish, pakënaqësitë brenda LDK-së.
I pari që reagoi, ishte ish-kryeministri, Avdullah Hoti.
“LDK nuk është pronë e askujt dhe nuk mund të jetë peng i interesave personale. LDK është më e madhe se secili individ, është një mision politik dhe historik”, u shpreh Hoti.
E njëjtë ka reaguar, edhe Arben Gashi nga ky subjekt.
Edhe ky shkroi, se LDK nuk është për vendin e tretë.
Ndërkohë, analistët politik, thonë se përplasjet brenda LDK-së, u intensifikuan kur Abdixhiku, I hapi derën e rikthimit, Vjosa Osmanit.
“Gjëja e parë që mendoj do duhej të bënte LDK-ja është një analizë të pavarur e cila do të nxirrte në sipërfaqe të gjitha defektet që aktualisht janë brenda LDK-së. Kur them analizë të pavarur e kam fjalën që mos të jetë një analizë sa për t’i mbulu dështimet ose sa për të përfitu ndonjë grup brenda partisë dhe në bazë të kësaj analize LDK-ja të hapej për reforma, të kthente legjitimitetin tek anëtarët e tyre nga niveli më i ulët i nëndegës deri niveli qendror”, vlerëson Avdi Smajljaj – profesor universitar.
E sipas politologut, Albinot Maloku, LDK ka mbetur pa identitet politik.
“Lidhja Demokratike e Kosovës është ende në kërkim të atij identitetit të vetë, i ka këto probleme për aryse të mendësive të ndryshme që kanë qenë në LDK, janë instaluar në ndërkohë ose që kanë ardhë si pasojë e rrethanave dhe në këtë rrafsh unë konsideroj se LDK këtë lloj demokracie vibrante duhet ta sqarojë përbrenda, për rrjedhojë ta sqarojë edhe identitetin e saj për arsye se aktualisht LDK është pa identitet politik” , shprehet Maloku.
Së fundmi, nënkryetari i LDK-së, Lutfi Haziri, tha se një koalicion me Lëvizjen Vetëvendosje, mund ta nxirrte vendin nga kriza politike.
“Është i vështirë do thoja, ka qenë më i lehtë para kthimit të zonjës Osmani, ajo e ka komplikuar këtë çështje sepse projeksionet e saj kanë qenë për postin e Presidentes, tani ulja e këtyre projeksioneve mund t’a sfidojë autoritetin e zonjës Vjosa Osmani, por në të njëjtën kohë retorika gjatë fushatës që u kthye në nivel personal do thoja e ka bërë shumë më të vështirë një bashkëpunim do thoja mes LDK-së dhe LVV-së”, thotë Smajljaj.
Sipas rezultateve, LDK ka marrë 18 ulëse në Kuvend me 135 mijë e 563 vota apo 16.69 për qind.
