Në orën 11:00 paraditen e së mërkurës dolën para foltores së Kuvendit.
E thirrjes së deputetëve të PDK-së, iu bashkuan edhe ata të Aleancës.
Krejt kjo, në shenjë protestë për mosvazhdimin e seancës konstituive nga Lëvizja Vetëvendosje.
E derisa këta po flisnin, në sallë hynë dy deputetë të Lëvizjes Vetëvendosje.
Këtyre të fundit duket se nuk u pëlqeu nisma e opozitarëve.
Gjersa brenda sallës plenare po zhvilloheshin këto skena, një konference u paralajmërua nga ushtruesja e detyrës së presidentes, Albulena Haxhiu.
Interesimi për ta dëgjuar nga afër Haxhiun, i nxori nga salla deputetët e PDK-së.
E kjo duket se e pengoi ushtruesen e detyrës së presidentes.
Ngjarjet morën hov kur sallës iu drejtua ministrja në detyrë e Drejtësisë, të cilën e ndoqën deputetët opozitarë.
Këtu u përmend edhe Gjykata Speciale e ministrat serbë.
E tensioni u rrit kur në afërsi të sallës, u paraqit edhe deputetja e LVV-së, Arbërie Nagavci.
Këtë të fundit, fizikisht e shtyu deputetja e Aleancës, Albana Bytyqi.
Nagavci vazhdoi tek ulëset e partisë, ku u prit nga deputetë të tjerë të PDK-së.
Në gjithë këtë situatë, u përdor edhe uji e letrat.
Ngjarjet e së mërkurës në Kuvendin e Kosovës, nuk përfunduan me kaq.
Përplasjet verbale kaluan edhe në ato fizike mes Mërgim Lushtakut nga PDK dhe Adnan Rrustemit e Ardian Golës nga LVV.
Nuk mbeti jashtë, as deputetja Arjeta Fejza.
Kurse deputetes Ganimete Musliu, punë i doli edhe me sigurimin e Kuvendit.
E në mesditën, në sallë u shfaq sërish ushtruesja e detyrës së presidentes, Albulena Haxhiu.
Kërkesat e PDK-së për thirrjen e seancës konstituive, bëri që Haxhiu mezi ta përfundonte fjalën.
E kur gjithçka mbaroi, në Kuvendin e Kosovës nisën të hyjnë deputetët nga Lidhja Demokratike e Kosovës.
Ndryshe, deputetët e PDK-së, paralajmëruan se protestat nuk do të ndalën derisa Kuvendi të konstituohet.
