Ka 26 vite që prehen në këto varreza.
Në përvjetorin e rënies së dëshmorëve të Prishtinës, këtë të premte u mbajtën homazhe në Velani.
Për të vlerësuar kontributin e tyre, erdhën edhe krerët shtetërorë.
E para e shtetit, Vjosa Osmani shprehu mirënjohje maksimale për rolin e dëshmorëve gjatë luftës.
“Këtu në Velani prihen një numër i madh i dëshmorëve të cilët kanë dhënë jetën për Kosovën që është edhe një dëshmi për luftën e gjatë për lirinë tonë, pavarësinë e shtetin që e gëzojmë sot. Prandaj i përkujtojmë të gjithë me respektin më të thellë dhe çdo ditë udhërrëfyes e kemi sakrificën që e dhanë këta dëshmorë në tokën e Kosovës”, tha Osmani.
E kontributin e dëshmorëve për Kosovën e çmoi lartë edhe kryetari i komunës së Prishtinës, Përparim Rama.
“Ditë madhështore 18 prilli, dita kur edhe i nderojmë dëshmorët e sidomos ata të rrethit të Prishtinës të Gollakut. Jam këtu edhe me Komandat Remin dhe me shokët e tijë me luftëtarë të Ushtrisë Çlirimtarë të Kosovës. Kemi ardh së bashku edhe vijmë cdo herë në këtë ditë për me nderu sakrificën e dëshmoreve e heronjve tanë njerëzve të mëdhenj, familjeve po ashtu që na kanë mundësuar që sot me gëzuar lirinë e demokracinë”, tha Rama.
I pranishëm ishte edhe ish komandanti i Ushtrisë Çlirimtare të Kosovës në zonën e LLapit, Rrustem Mustafa, i njohur me nofkën komandant “Remi”.
“Sot është ditë e madhe për Prishtinë është dita e dëshmorëve të Komunës së Prishtinës, unë vetëm kisha me i uruar të gjithë qytetarët, gjithë familjet e dëshmorëve, gjithë ushtarët e Ushtrisë Çlirimtare të Kosovës edhe qytetarët në përgjithësi”, deklaroi Mustafa.
Për të bërë homazhe për dëshmorët e rënë, ishte edhe kryeministri në detyrë, Albin Kurti.
Me rastin e shënimit të Ditës së Dëshmorëve, Komuna e Prishtinës, organizoi aktivitetet përkujtimore edhe në Makovc dhe në Marevc.
