Këngët patriotike kanë nisur që nga mëngjesi.
Është kjo atmosfera që të martën u pa tek fan-clubi zyrtar i “Dardanëve” në Prishtinë.
Këtu po bëhen edhe përgatitjet e fundit, para ndeshjes historike kundër Turqisë.
Në këtë finale, kombëtarja që e përkrahën nga dita e parë, po e kërkon një biletë për Kupën e Botës, Amerika 2026.
E gjasat që në fund të preket ëndrra, janë të mëdha sipas kryetarit të tifogrupit “Dardanët”, Lulzim Berishës.
“Pritshmërit tona janë një gol epërsi për Kosovën dhe Kosova kualifikohet në Botëror…”, ka thënë Berisha.
I pari i Dardanëve, thotë se edhe në këtë ndeshje, nuk do të mungojë atmosfera dhe mbështetja pa kushtë për Kosovën.
“Gjithmonë kur ka luajtur Kosova ka pasë atmosferë, gjithmonë ka me pasë, deri në frymën e fundit me Kosovën… Unë besoj që gjithë shqiptarët duhet të vijnë në shesh ka në Pallatin e Rinisë, dy vende në shesh dhe pas lojës me festën e madhe kualifikimin në botëror me festu së bashku me qytetarët, stafin, me FFK-në me të gjithë akterët që deri sot kanë dhënë kontribut për këtë vend dhe besoj që festa e madhe do të bëhet në shesh”, u shpreh tutje Berisha.
Optimist për fitore janë edhe tifozët e parë që arritën në vendgrumbullimin e “Dardanëve”
“Edhe sot rezultati 2:1 ka me qenë, e pamundur që s’fitojmë sot dhe 90 për qind fitoren e kemi dhe ashtu si e kamë dhënë prognozën në Sllokavi, edhe këtu e kam dhënë 2:1 rezultati”, ka thënë një tifoz.
“Rezultati nuk është me rëndësi, me rëndësi është veç fitorja, 1:0, 2:1, 2:0, por me rëndësi është fitorja edhe presë me fitu, nëse i bëjnë lojët qysh i kanë bërë deri më tash, ma merr mendja që edhe këtë lojë kemi me arritë me fitu”, u shpreh edhe një tifoz tjetër.
Ndeshja finale mes Kosovës dhe Turqisë për një vend në Kampionatin Botëror, fillon në ora 20:45.
