Komisioni Qendror i Zgjedhjeve (KQZ) ka njoftuar se deri të martën pasdite është përmbyllur numërimi i votave të kandidatëve për deputetë dhe verifikimi i rezultateve të subjekteve politike nga formularët e plotësuar në vendvotime, në nëntë Qendra Komunale të Numërimit (QKN).
Sipas KQZ-së, komunat ku ka përfunduar ky proces janë: Mamushë 6 vendvotime, Shtërpcë 17, Junik 6, Hani i Elezit 11, Kllokot 8, Mitrovicë e Veriut 22, Novobërdë 23, Zveçan 11 dhe Viti 64.
Deri më tani, numri i përgjithshëm i vendvotimeve të procesuara nga të gjitha Qendrat Komunale të Numërimit ka arritur në 1 mijë e 221 nga gjithsej 2 mijë e 557 vendvotime, që përfaqëson 47.75 për qind të totalit.
Procesi i numërimit dhe verifikimit të votave është duke vazhduar në 29 Qendra Komunale të Numërimit të tjera në gjithë vendin.
“Pas përfundimit të numërimit të çdo vendvotimi, të dhënat janë duke u transmetuar në platformën e KQZ-së për rezultate: https://resultsparliamentary2025.kqz-ks.org/”, theksohet në njoftim./teve1.info/
