Këshilli Prokurorial i Kosovës një ditë më parë ka votuar Blerim Isufajn për Kryeprokuror të Shtetit. Por lidhur me këtë proces janë shprehur të shqetësuar përfaqësuesit ndërkombëtar në Kosovë dhe shoqëria civile.
Reagimet e para erdhën nga Shefi i BE-së, Tomas Szunyog dhe nga ambasadori gjerman, Jorn Rohde.
Që të dy mbetën të habitur dhe të zhgënjyer me rrjedhën e procesin e përzgjedhjes së Kryeprokurorit.
I shqetësuar u shpreh edhe ambasadori amerikan, Jeffrey Hovenier, i cili tha se anëtarët e KPK-së nuk i kanë marrë parasysh ankesat legjitime dhe rekomandimet e panelit shqyrtues.
“Disa herë Shtetet e Bashkuara shprehën pritshmëri për procesin e përzgjedhjes së Kryeprokurorit të ardhshëm të Shtetit, të cilat ne besojmë se i kanë edhe qytetarët e Kosovës: të jetë i drejtë, objektiv, transparent dhe i bazuar në merita. Jemi të shqetësuar se mënyra se si KPK i ka zhvilluar këto procedura ka dëmtuar besimin e publikut kosovar dhe besimin tonë në KPK, si institucion publik”, tha ambasadori amerikan.
Leotrim Gashi nga Instituti i Kosovës për Drejtësi, i cili ka monitoruar këtë proces, thotë se asnjëri nga kandidatët nuk i ka plotësuar kriteret për Kryeprokuror.
E sipas juristit Anton Ndrecaj, i gjithë ky proces duhet të kthehet në pikën zero nga zyra e presidentit.
Televizioni ka pyetur në zyrën e presidentes lidhur me dekretimin e mundshëm si Kryeprokuror të Blerim Isufaj, por përgjigja nga Presidenca ka munguar.
Raporti i gazetarit Shpat Blakçori.