Një nga një, po vazhdon numërimi i votave.
Në këtë mënyrë, ka nisur të zbardhet edhe përbërja e re e Kuvendit të Kosovës.
Në krahasim me legjislaturën e fundit, në të ardhshmen duket se do të hyjnë disa emra të rinj, e shumë të vjetër pritet të mbesin jashtë.
Me këtë trend të numërimit, pa votat e diasporës, Lëvizja Vetëvendosje pritet të ketë 48 ulëse në parlament.
Nga hera e kaluar, sipas rezultateve aktuale, duket se jashtë Kuvendit do të mbesin emrat si Artan Abrashi, Salih Zyba, Fjolla Ujkani, Fitim Haziri, Vigan Qorolli e Naim Bardiqi.
Bashkë me ta, mund të jenë edhe Egzon Azemi, Bylbyl Sokoli, Rozeta Hajdari, Fatos Geci e Enver Dugolli.
Ndërkaq, ulëse në Kuvend për herë të parë pritet të sigurojnë hoxha Osman Musliu, ish-gazetari Arton Konushevci, aktori Armend Baloku, si dhe Krenare Çerkini.
Megjithatë, renditja mund të ndryshoj pas numërimit të votave të diasporës.
Nga rezultatet preliminare, Partia Demokratike e Kosovës pritet të ketë 24 ulëse.
Në përbërjen e re të PDK-së në Kuvend, të paktën tash për tash duket se do të jetë doktori Adriatik Berisha.
E në Kuvend pritet të rikthehet edhe doktori tjetër, Bekim Haxhiu.
Jashtë Kuvendit, sipas numërimit të deritanishëm, duket se do të mbesin Ariana Musliu Shoshi, Rashit Qalaj, Arbnore Salihu e Nait Hasani.
Ndryshime të rëndësishme në përbërjen e re në Kuvend, do të ketë edhe Lidhja Demokratike e Kosovës.
Për dallim nga 28 dhjetori, brenda Kuvendit do të jenë disa nga emrat që iu bashkuan së fundmi partisë.
Ndër ta është bartësja e listës, Vjosa Osmani, si dhe Albena Reshitaj e Jeta Statovci.
Ndryshe nga to, Haxhi Avdyli duket se do të mbetet jashtë Kuvendit.
Fatin e njëjtë, pritet ta ketë edhe Adelina Thaqi-Meta.
Situata krejt ndryshe është në Aleancë.
Ndryshe nga legjislatura e kaluar, në të renë Aleanca pritet të përfaqësohet nga tetë deputetë.
Ramush Haradinajt, Besnik Tahirit, Bekë Berishës e Time Kadriajt e Albana Bytyqi, pritet t’u bashkohen të paktën edhe Burim Ramadani e Agim Çeku.
Renditja përfundimtare do të përcaktohet pas numërimit të votave të diasporës.
