Normaliteti u kthye në mesditë në stacionin e Autobusëve në Prishtinë.
Për këtë, edhe udhëtaret vazhduan rrugën drejt destinacioneve të tyre.
Por gjendje tjetër, ishte këtu mëngjesin e së martës.
Kjo pasi një alarm për bombë, i solli këtu forca të shumta policore.
Por e gjithë situata përfundoi shumë shpejtë.
Pavarësisht kësaj, qytetarët thonë se nuk ndihen të rrezikuar.
“Nuk kam dëgjua dhe nuk frikohem aspak prej rasteve të tilla sepse vetëm Zoti e di ku e përfundojmë jetën dhe çfarë shkaku paraqitet”, ka thënë qytetari.
Se alarmi sërish doli i rrejshëm, e ka konfirmuar edhe Policia e Kosovës.
“Informata është trajtuar nga ana e policisë. Pas kontrolleve të kryera nga njësitet kompetente, nuk është gjet asgjë e dyshimtë. Hetuesit policor në koordinim me prokurorin e shtetit, kanë filluar punën për zbardhjen e të gjitha rrethanave që ndërlidhen me këtë rast i cili është cilësuar si lajmërim i rrejshëm”, u shpreh Policia e Kosovës.
E njohësit e sigurisë thonë se rastet e tilla duhet të merren seriozisht.
“Zakonisht kur janë anonime dhe nuk ka ndonjë motiv të caktuar atëherë vështirë është edhe të gjendet kryesi në këtë rast. Por gjithsesi mendoj se Policia ia ka dal në disa raste të i zbuloj këto paralajmërime kërcënuese. Mendoj se edhe në këtë rast do të ia dal, duhet pritur. Opinioni nuk duhet të jetë i shqetësuar për këtë se këto ndodhin gjithë andej edhe kërcënimet edhe për shkolla, edhe për objekte publike, infrastrukturën kritike e vende të tjera. Po gjithsesi që çdo herë çdo kërcënim duhet të merret si seriozisht në qasje mu për shkak të mundësive në dëme në njerëz, dëmeve material dhe dëmet e tjera kolaterale që mund të ndodhin nga një shpërthim i mundshëm”, ka thënë Ibishi.
Ndryshe, ky është alarmi i dytë për mjet shpërthyes në Stacionin e Autobusëve në Prishtinë, brenda pak ditësh.
