Këtë të shtunë filloi mbledhja e nënshkrimeve për peticionin “Për një Ferizaj pa Urosevac.
Kjo nismë qytetare synon t’i drejtohet Kuvendit të Kosovës me kërkesën për shfuqizimin e përdorimit zyrtar të emrit “Urosevac” dhe përdorimin e vetëm të emrit “Ferizaj”.
I pari që e nënshkroi peticionin ishte kryetari i Komunës së Ferizajt, Agim Aliu.
“Do e mbështesim një iniciativë të tillë, është një drejtësi, sepse Ferizaj ka lindur 153 vjet më parë me emrin Ferizaj, ndërsa emri Urosevac është vendosur nga administrimi i dhunshëm pas vitit 191. Prandaj po besoj se me fillim e nënshkrimit të këtij peticioni dhe me mbështjetjen institucionale duke filluar nga Komuna e Ferizajt dhe në nivelet më të larta do vëhët drejtësia dhe do vëhët vetëm një emër për Ferizaj ashtu sic ka lindur. Pra qyteti i Ferizaj ka lindur në vitin 1873 ka lindur me emrin Ferizaj dhe nuk ka emër tjetër për Ferizaj përpos se Ferizaj”, tha Agim Aliu.
Iniciatori i peticionit, Bashkim Fazliu, e cilësoi këtë nismë si një hap të rëndësishëm për qytetin.
Sipas Fazliut, ky peticion pritet të zgjasë dy javë, rrjedhimisht t’i mbledhë reth 20 mijë nënshkrime.
“Sot është një ditë historike për qytetarët e Ferizajt, ku duke shfrytëzuar një të drejtë demokratike kemi nisur peticionin drejtuar Kuvendit të Kosovës për shfuqizimin e përdorimit zyrtar të emrit Urosevac. Nga pushtuesit serb. Shfuqizimin e përdorimit zyrtar nga tabelat, dokumentet, regjistrat, aktet ligjore dhe komunikimin zyrtarë të institucioneve të Republikës së Kosovës. Njëkohësisht kërkojmë që në të tri gjuhët – shqip, serbisht dhe anglisht – të përdoret vetëm emri Ferizaj në të gjitha dokumentet, tabelat, regjistrat, aktet ligjore dhe komunikimin zyrtar të Republikës së Kosovës. Ky peticion është me vullnetin e lirë të qytetarëve të Ferizajt dhe nuk ka të bëjë asgjë kundër asnjë komuniteti. Këtë peticion e kanë mbështetur të gjitha partitë politike në Ferizaj, si dhe partitë e komuniteteve joshumicë. Ka një unitet të plotë në këtë kërkesë”, deklaroi Fazliu.
Ndërsa janë edhe vetë ferizajasit ata që e mirëpritën një nismë të tillë, ndonëse e cilësuan si të vonuar.
Kjo është iniciativë e mirë është dashur që moti të kryhet kjo dilemë, po tash e kanë bërë.
“Me Migjenin jam në bashkëbisedim lidhur me këtë iniciativë të tij për heqjen e këtij, për këtë padrjetësi që ju ka bërë Ferizajt, besoj që duhet me heq këtë Urosevac se nuk na duhet asgjë”, deklaroi Sabedin Mustafa, qytetar i Ferizajt.
“Kam lind dhe jam rrit në Ferizaj e di si ka qenë përpara e di si është sot mendoj që nuk ka asnjë nevojë me pas Urosevac”, tha Emine Bajraktari.
Madje një emër i tillë për Ferizajn sipas këtij qytetari nuk është dashur as të ekzistonte.
“Vendosja e emrit Urosevac ka ardhur nga pushtimi i Serbisë në shekullin XX dhe është mbetje koloniale e asaj kohe nuk ka të bëjë asgjë me pakicat e as me të drejtat minoritare është thjeshtë mbetje koloniale e cila nuk ish dashtë me ekzistua”, pohoi qytetari tjetër, Mehdi Sejdiu.
Në mbështetje të kësaj nisme dolën edhe partitë opozitare në Komunën e Ferizajt, si dhe përfaqësues të komuniteteve joshumicë.
