Nga kjo e martë, ditët e tij kanë nisur ndryshe,
Pas mbi tri dekadash si punëtor në sektorin e arsimit, Xajë Mustafa të hënën doli në pension.
E para 27 viteve, Mustafa ishte protagonisti kryesor i kësaj fotografie, e cila u kthye në simbol të vuajtjeve të mijëra familjeve kosovare gjatë luftës.
Për TËVË1, 65 vjeçari rrëfen se asokohe e rrezikoi jetën për këto dy fotografi të fëmijëve, të cilat mendonte se ishin të vetmet kujtime nga ta.
“Çka kam pas maltretime çka kam pas thyerje i kam pas për shkak të këtyre fotografive pse nuk po i lenë ti ato, unë iu kam thënë nuk i lë, shpirtin po por fotot e fëmijëve të fëmijë nuk i lë”, ka thënë Mustafa.
Me foto në duar ai edhe u lirua. E në mendje e kishte brengën se familja mund t’i ishte ekzekutuar nga focat serbe.
Pikërisht këtë moment, me shkrepjen e tij, e bëri të pavdekshëm, fotografi ndërkombëtar, Peter Turnley.
“Më pyesin për çka gjithë këtë maltretim, unë i kam nxjerrë ato dy foto i papërgatitur dhe i kam thënë për këto dy foto, unë nuk kamë pas vetëdije e as kondicion me qendru aty”, u shpreh tutje Mustafa.
Për 110 ditë, Mustafa ishte i bindur se fëmijët e tij nuk jetonin më.
Mirëpo, më 3 qershor të vitit 1999, kjo brengë do të merrte fund. Atë ditë, pas rikthimit në Mitrovicë, familja Mustafa më në fund u ribashkua.
“Kur dola prej një kombi busi të vogël, e pash djalin në një rrugicë aty duke luajtur me top dhe ish një farë e dridhur edhe e thirri, babii… pastaj përqafimet e ledhatimet nuk u ndalshin”, theksoj Mustafa.
Pas 33 viteve kontribut në arsim si punëtor teknik, tash Mustafa do të ketë më shumë kohë të përkujdeset për kopshtin e tij.
“Alarmin 5:45 më ka bërë, më kohën që kam pas më u nis për në punë vetëm jam qu jam vesh dhe jam kthy prapë në dhomë”, ka përfunduar Mustafa.
Për punën e palodhur në arsim, por edhe për rrugëtimin e tij të dhimbshëm gjatë luftës, shkolla e mesme e ulët, Migjeni, ia ndau Xajë Mustafës një mirënjohje.
