Ishte në kërkim të shërimit.
Por në vend se ta merrte atë, A.B. nga fshati Lybeniq i Pejës u mashtrua.
Ky i fundit ra pre e një skeme që nga maji i 2021-tës gjer në shtator të 2023-tës.
Një person me inicialet V.H. iu paraqit atij rrejshëm si mjek në specializim në një spital në Turqi.
Atij i ndihmoi edhe A.K., të cilët në bashkëpunim, i premtuan A.B. se do i ndihmonin në kryerjen e transplantimit të veshkës.
Ndaj të dyshuarve, Prokuroria Themelore në Pejë së fundmi ngriti aktakuzë.
Sipas aktakuzës, V.H. i kishte premtuar të dëmtuarit se do të bisedonte me një doktor në një spital në Turqi për gjendjen e tij shëndetësore, duke i kërkuar kështu që vazhdimisht t’i dërgonte të holla.
Kësisoj, atij ia morën përplot 134 mijë e 761 euro.
Në këtë rast ishte përfshirë edhe një shtetas turk, i cili paraqitet kinse si dhurues i veshkës.
Detaje për televizionin dhanë nga Prokuroria Themelore në Pejë.
“Fillimisht janë arrestuar personat e dyshuar, kanë qenë nën masën e paraburgimit. Hetimet janë ndërmarrë në dhjetëra veprime hetimore dhe pas grumbullimit të provave të cilat janë marrë në koordinim të plotë me Policinë e Kosovës dhe institucionet përkatëse është krijuar dyshimi i bazuar mirë se të njëjtit kanë kryer veprën penale ‘Mashtrimi’, me këtë rast viktimës i kanë marrë një shumë të konsiderueshme kinse për të kryer një transplatimin të veshkës. Mirëpo për fat të keq e gjitha kjo ka qenë një skenë e mashtrimit”, deklaroi zëdhënësi i Prokurorisë Themelore në Pejë, Shkodran Nikçi.
Siç bën të ditur zëdhënësi i Prokurorisë, njëherë për njëherë, ndaj shtetasit turk, procesi është pezulluar.
“…është edhe një person tjetër i implikuar e që është shtetas i Republikës së Turqisë e që ndaj tij është pezulluar procesi për momentin për shkak se pritet që kjo çështje të trajtohet qoftë në Republikën e Kosovës apo të Turqisë”, bëri të ditur Nikçi.
Ngritjen e aktakuzës e mirëpritën familjarët e të dëmtuarit.
Megjithatë, avokati i A.B. thotë se presin që edhe personi i tretë në këtë rast, të përballet me drejtësinë.
“Ajo se çfarë na ka brengosur shumë është pjesa e të ashtuquajturit donator, ka ngelë si procedurë e veçuar nga ana e Prokurorisë së Shtetit. Ajo na ka bërë me u shqetësu pak, por besojmë dhe shpresojmë që herët a vonë shteti turk ka me dorëzuar personin që është paraqitur si donator për dhurimin e veshkës edhe pse ajo ka pasur për t’u paguar dhe se paradhënia veç se është dhënë, janë faturat të cilat janë paguar, janë kontrollet të cilat janë bërë por të gjitha kanë rezultuar negative pasi që asnjëherë i njëjti nuk i ka marrë ato shërbime”, bëri të ditur Fitim Maloku, avokat i palës së dëmtuar.
Sipas Prokurorisë, i akuzuari V.H. është emër i njohur për sistemin e drejtësisë.
