Skuadra e Pejës ka shënuar fitore të thellë në kuadër të Ligës Unike.
Në çerekfinale të “Final 8” të kësaj gare që po mbahet në Vlore, Peja e eliminoi Teutën e Durrësit. Në duelin e luajtur të enjten, skuadra pejane triumfoi me rezultatin e thellë 122:78.
Peja gjatë tërë ndeshjes ishte më e mirë se Teuta, ndërsa mjaftoi çereku i parë për t’i dhënë fund dilemës së fituesit. Këtë periudhë, Peja e fitoi me shifrat 45:13, për t’i fituar edhe dy çerekët tjerë për fitoren bindëse. Teuta e fitoi vetëm periudhën e katërt, e cila nuk pati ndonjë vlerë pasi fituesi veçse ishte caktuar.
Justin Davis me 29 pikë, 14 kërcime e 6 asistime ishte më i dalluari te Peja, ndërsa me lojë të mirë u veçuan edhe Larry Thomas (19 pikë) e Deandre Davis (18 pikë). Te Teuta, tre basketbollistë e mbyllën ndeshje me pikë dyshifrore por më efikasi ishte Patrick BAcon me 27 pikë, 5 kërcime e 7 asistime.
Në gjysmëfinale të “Final 8” të Ligës Unike, Peja do të përballet me Golden Eagle Yllin. Kjo ndeshje luhet të premten prej orës 16:00.