Dy ndeshjet e para gjysmëfinale të play-offit të Superligës së Kosovës në basketboll nuk kanë kaluar pa dënime.
Komisioni i Garave pranë FBK-së, të martën ka shqiptuar dënime të rënda, sidomos për kampionen në fuqi, Pejën. Skuadra e Pejës përpos gjobës prej 5 mijë eurosh është dënuar edhe me dy ndeshje si vendas pa praninë e shikuesve.
Ky dënim i Pejës ka ardhur pas në ndeshjen me Golden Eagle Yllin në palestrën “Karagaçi”, ku ka pasur hedhje të gjësendeve të forta në parket nga ana e tifozëve pejan dhe është goditur në kokë basketbollisti i ekipit mysafir, amerikani Alonso Verge Jr, i cili paraprakisht bëri një provokim pas shënimit të pikëve.
Ai ka pësuar lëndim të lehtë, ndërsa për shkak të këtij veprimi, gjyqtarët kanë marrë vendim që të zbrazet pjesa e tifozëve prej ku edhe janë hedhur gjësendet.
E gjithë kjo ka ndodhur në fund të takimit, të cilin Peja e humbi me rezultatin e ngushtë 87:84 dhe është në disavantazh 1:0 ndaj Yllit.
Po ashtu, edhe trajneri i Pejës, Rami Hadar është gjobitur me 300 euro për gabim teknik. Tek Ylli janë gjobitur me nga 100 euro amerikanët Verge dhe Nate Grimes për gabime teknike. Te Peja kanë reaguar ndaj këtyre vendimeve, si dhe kanë paralajmëruar ankesë.
Dueli i dytë mes Yllit dhe Pejës, luhet të mërkurën në Suharekë dhe ekipi që regjistron tri fitore kualifikohet në finale.
Ndërkohë, një gjobë në vlerë prej 1200 eurosh e ka marrë edhe skuadra e Trepçës për shkak të fyerjeve të tifozëve të saj ndaj Dardan Berishës dhe hedhjes së gjësendeve të drejtim të lojtarëve të Prishtinës.
E te Prishtina është gjobitur me 100 euro basketbollisti Malcolm Armstead për gabim teknik. Trepça e fitoi ndeshjen e parë gjysmëfinale me shifrat 87:81, ndërsa përballja e dytë mes këtyre dy skuadrave luhet të enjten mbrëma në Prishtinë.
