Partia Demokratike e Kosovës do t’i drejtohet sot Gjykatës Kushtetuese lidhur me zhvillimet e fundit në Kuvendin e Kosovës.
PDK-ja pritet të kërkojë vlerësimin e Kushtetueses për konstituimin e Kuvendit dhe formimin e Qeverisë Kurti 4.
Kjo parti ka njoftuar se në orën 09:00 do të mbajë konferencë për media para objektit të Gjykatës Kushtetuese.
Në konferencë do të flasin shefi i Grupit Parlamentar të PDK-së, Arian Tahiri, deputeti Përparim Gruda dhe avokati Faton Fetahu.
Sipas njoftimit, gjatë konferencës do të bëhen të ditura detajet e lëndës që PDK-ja do ta dorëzojë në Gjykatën Kushtetuese.
PDK-ja kishte paralajmëruar të dielën se do t’i drejtohej Kushtetueses jo vetëm për konstituimin e Kuvendit, por edhe për formimin e Qeverisë Kurti 4.
Qeveria e re, e drejtuar nga Albin Kurti, u votua të dielën në Kuvend me gjashtëdhjetë e dy vota për.
Para votimit të Qeverisë, Kuvendi zgjodhi tre nënkryetarë. Kujtim Shala u zgjodh nga radhët e LDK-së, Emilija Rexhepi nga komunitetet joshumicë dhe Tanja Vujoviq nga komuniteti serb. Vujoviq vjen nga Lista Serbe.
Pas zgjedhjes së tyre, kryetarja e Kuvendit, Albulena Haxhiu, e konsideroi Kuvendin të konstituuar, ndonëse PDK-ja nuk kishte propozuar përfaqësuesin e saj për nënkryetar.
