Partia Demokratike e Kosovës kishte deklaruar në vazhdimësi se ishte e gatshme të votonte për një kandidat të Vetëvendosjes që nuk kishte qenë pjesë e kabinetit “Kurti 2”.
“PDK nuk voton asnjë anëtar të kabinetit Kurti 2”, ka thënë Krasniqi.
Mirëpo, këto fjalë nuk u mbajtën nga kryetari i PDK-së, Memli Krasniqi.
Partia e tij refuzoi të votojë për Dimal Bashën, kandidatin e VV-së për kryetar të Kuvendit.
Ky i fundit mori vetëm 57 vota, duke e zgjatur edhe më tej bllokadën për zgjedhjen e kryeparlamentarit.
Në arsyetimin e saj, PDK tha që kishte kërkuar pauzë për koordinim për ta votuar Bashën, por një gjë e tillë sipas tyre, nuk iu ishte lejuar.
Deputetja e këtij subjekti Vlora Çitaku në një deklaratë për media tha se nuk kishin votë kundër Dimal Bashës për Kryetar të Kuvendit, por se pauzën 10 minutëshe e kërkuan për ta vërtetuar “se e kanë seriozisht”.
Megjithatë Naim Jakaj nga Instituti i Kosovës për Drejtësi vlerëson se PDK nuk e përmbushi premtimin dhe është përgjegjëse për dështimin e seancës.
“Një parti politike serioze dhe demokratike siç është PDK-ja, ka premtuar votimin e një kandidati për kryetar Kuvendi që nuk ka qenë pjesë e ekzekutivit. Në këtë rast, e ka mashtruar publikun, sepse nuk i ka mbajtur fjalët e veta. PDK është përgjegjëse deri në seancën që do të mbahet nesër.”, ka thënë Jakal nga IKD-ja.
Tutje, Jakaj thekson se kriza institucionale po i kushton shumë Kosovës.
“Moskonstituimi i Kuvendit e ka dëmtuar rëndë Kosovën në politikën e jashtme, sidomos në procesin e anëtarësimit në Këshill të Evropës, ku nuk kishim një ministri funksionale që të komunikonte me KiE-në. Po ashtu, nuk u rishikua buxheti i Republikës dhe mungojnë bordet drejtuese të institucioneve.”, është shprehur tutje Jakaj.
Në anën tjetër, Lëvizja Vetëvendosje nuk ka bërë ende të ditur se kë do të propozojë nesër për postin e kryetarit të Kuvendit.
Ndërkaq, sipas aktgjykimit të Gjykatës Kushtetuese, deputetët kanë 30 ditë afat për ta zgjedhur kryetarin dhe pesë nënkryetarët.
