Partia Demokratike e Kosovës i ka bërë thirrje Feride Rushitit të tërhiqet nga kandidatura për presidente.
Qëndrimin e partisë e ka shprehur nënkryetarja Vlora Çitaku në një deklarim për media para nisjes së vazhdimi të seancës së jashtëzakonshme për zgjedhjen e presidentit e paraparë të mbahet në ora 14:00.
“Nga zemra i bëj thirrje zonjës Feride Rushiti të tërhiqet nga kjo lojë politike antikushtetuese e Albin Kurtit. E turpshme për shtetin dhe atë vet. Më vjen keq që ka pranuar të huazojë emrin e saj për një maskaradë të rrezikshme politike”, ka thënë ajo.
Çitaku tha se në këtë situatë reagimi opozitar dhe qytetar është detyrim për të mbrojtur rendin kushtetues dhe të ardhmen e vendit.
“Ne si subjekt politik opozitar do t’i ndërmarrim të gjitha masat e nevojshme për këtë. Sot nga Kuvendi i Republikës së Kosovës dua të apeloj te partia në pushtet që t’i ndërpresë këto veprime karateje të dhunës politike, sepse ky nuk është Kuvendi i karatesë, por institucion i të zgjedhurve të popullit”, theksoi ajo.
Çitaku shtoi se Kushtetuta, ligjet dhe rregullorja e Kuvendit të Kosovës nuk mund të interpretohen sipas interesit ditor politik.
“Kur një kryeministër, lider politik zgjedhë me vetëdije të plotë të shkelë Kushtetutën për pushtet të përkohshëm, ai bëhet rrezik edhe për vetë themelet e shtetit”, tha ajo./teve1.info/
