Partia Demokratike e Kosovës ka reaguar pas tensioneve dhe përleshjeve të shënuara mes protestuesve dhe Policisë së Kosovës, duke dënuar përdorimin e forcës ndaj qytetarëve që po protestojnë për miratimin e ligjit për Dhomat e Specializuara.
Në reagimin e saj, PDK-ja ka kërkuar nga Qeveria përgjegjësi të menjëhershme dhe nga organet shtetërore ndaljen e çdo veprimi që, sipas saj, është joproporcional dhe cenon të drejtën e qytetarëve për protestë.
“PDK dënon ashpër përdorimin e dhunës ndaj qytetarëve që po protestojnë për miratimin e ligjit që mbron UÇK-në. PDK kërkon nga Qeveria përgjegjësi të menjëhershme dhe nga organet shtetërore ndaljen e çdo veprimi joproporcional që po cenon rëndë të drejtën e qytetarëve për protestë”, thuhet në reagim.
PDK ka theksuar se lufta e UÇK-së është pjesë e pandashme e historisë dhe identitetit të Kosovës, ndërsa ka kërkuar që procesi i miratimit të ligjit të përmbyllet pa vonesa.
Sipas PDK-së, qytetarët, veteranët, invalidët dhe familjarët e dëshmorëve po protestojnë me një kërkesë të qartë dhe institucionet duhet t’u përgjigjen përmes vendimmarrjes dhe jo përdorimit të forcës.
“Qeveria nuk mund ta zëvendësojë përgjegjësinë për vendimmarrje me përdorimin e forcës ndaj qytetarëve”, thuhet më tej në reagim.
Partia ka kritikuar gjithashtu përdorimin e forcave të sigurisë gjatë protestës, duke thënë se ato duhet t’u shërbejnë qytetarëve dhe të mbrojnë të drejtat e tyre.
“Asnjë urdhër politik nuk mund ta justifikojë dhunën ndaj qytetarëve që ushtrojnë të drejtën për protestë”, përfundon reagimi i PDK-së.
PDK u ka bërë thirrje të gjitha grupeve parlamentare dhe deputetëve që, sipas saj, të veprojnë pa vonesë dhe ta përmbyllin procesin e miratimit të ligjit.
