Vend para objektit të Zyrës së Rregullatorit të Energjisë kanë zënë zyrtarët e Policisë së Kosovës.
Kjo vetëm pak minuta para se të niste protesta e qytetarëve kundër shtrenjtimit të energjisë elektrike.
Objekti i ZRRE-së ishte stacion i protestuesve, por fillimisht u mblodhën në sheshin “Zahir Pajaziti”.
Aty aktivistët e “Asnjë cent më shumë” akuzuan ZRRE-në për dëmtim të sistemit energjetik.
Për këtë institucion madje u paralajmërua padi.
“Sot në mënyrë arbitrare, të njëanshme, bordi skandaloz i ZRRE-së, vendosi në emër të qytetarëve pa i pyetur dhe pa i marrë konsideratë komentet e tyre. Ata sot nuk e përfaqësojnë dhe nuk janë atje për të rregulluar aspektin energjetik në Kosovë, por janë atje për ta dëmtuar edhe më tutje standardin e qytetarëve të kësaj republike. Ne ia çojmë një selam që këta qytetarë që janë sot këtu, ata që ishin nga protesta e 5 prillit dhe shumë mijëra të tjerë kanë dhënë përgjigjen dhe përgjigjja është e qartë asnjë cent me shumë”, tha aktivisti i “Asnjë cent më shumë”, Besnik Shabiu.
“E ne kërkesën tonë, padinë tonë do ta dërgojmë në Gjykatën Themelore në Prishtinë, sepse kjo Republikë ka institucione që e mbrojnë publiken dhe Republikën”, tha aktivisti, Ali Sefaj.
Rrugës për në ZRrE gjithë protestuesit bërtitën një zëri asnjë cent më shumë për energjinë.
E kur mbërritën para zyrave të institucionit patën një thirrje për ta.
Ani pse po thërrisnin për t’i dëgjuar, përgjigje nuk morën
“O ZRrE a po na dëgjoni a jo, zbritni poshtë shihni sa njerëzit janë, ua sigurojmë që kemi me u bë edhe më shumë kështu që sa nuk është vonë është mirë që mos ta merrni atë vendim”, tha aktivisti Luan Hasanaj.
Para qytetarëve foli edhe përfaqësuesi i punëtorëve të KEK-ut, Nexhat Llumnica.
“Në kohën kur çmimi i energjisë elektrike po stabilizohet edhe në Evropë, në muajin maj e kemi kontratën nga kompanitë e licencuara me 72 euro megavat me Energji Elektrike kurse këta në Kosovë po dojnë me na ngritë çmimin”, tha Llumnica.
E krejt në fund, ata u larguan e pankartat mbetën në tokë.
Por, zëri i tyre nuk u dëgjua, pasi menjëherë pas përmbylljes së protestës, u shtrenjtua energjia elektrike.
