Sindikata e Policisë së Kosovës ka reaguar, të hënën, pas vdekjes tragjike të një zyrtari gjatë orarit të punës, duke kërkuar nga institucionet përgjegjëse që të ndërmarrin masa urgjente për sigurimin jetësor dhe shëndetësor të pjesëtarëve të Policisë së Kosovës.
Në reagimin e saj, sindikata thekson se humbja e jetës së një polici në krye të detyrës dëshmon edhe një herë rrezikun e madh me të cilin përballen çdo ditë zyrtarët policorë në shërbim të qytetarëve dhe ruajtjes së rendit publik.
Sipas sindikatës, ky rast rikthen në vëmendje nevojën urgjente për trajtimin e çështjeve jetike që lidhen me mirëqenien e pjesëtarëve të Policisë së Kosovës, duke pasur parasysh se ata kryejnë detyra me përgjegjësi të lartë dhe shpesh në kushte me rrezik të shtuar për jetën dhe shëndetin.
Sindikata u ka bërë thirrje institucioneve përgjegjëse që sa më parë të ofrojnë zgjidhje konkrete për këto çështje të kahershme, në mënyrë që zyrtarëve policorë t’u garantohet mbrojtja dhe përkrahja që meritojnë.
Në fund të reagimit, Sindikata e Policisë së Kosovës u ka shprehur ngushëllimet më të sinqerta familjes së policit të ndjerë, kolegëve të tij dhe gjithë pjesëtarëve të Policisë së Kosovës për humbjen e rëndë në krye të detyrës.
