Ministri i Jashtëm i Iranit, Abbas Araghchi zhvilloi një takim me presidentin rus Vladimir Putin, ku theksoi marrëdhëniet e ngushta mes Teheranit dhe Moskës dhe falënderoi Rusinë për mbështetjen e saj të vazhdueshme.
Gjatë takimit, Araghchi vlerësoi publikisht rolin e Federatës Ruse në mbështetje të Iranit, duke deklaruar: “Ne i kemi dëshmuar të gjithë botës se Irani ka aleatë dhe miq të mirë si Federata Ruse”.
Ai shtoi gjithashtu: “Ju falënderojmë për qëndrimin tuaj të vendosur dhe të palëkundur në mbështetje të Republikës Islamike të Iranit”.
Nga ana e tij, Putin theksoi angazhimin e Rusisë për stabilitet rajonal dhe bashkëpunim me Iranin.
“Nga ana jonë, ne do të bëjmë gjithçka që i shërben interesave tuaja, interesave të të gjithë popujve të rajonit, për të arritur këtë paqe sa më shpejt të jetë e mundur. Ju e dini mirë qëndrimin tonë”, tha ai në komentet e transmetuara nga TASS.
Sipas raportimeve nga RIA Novosti, Araghchi e falënderoi sërish Moskën për mbështetjen ndaj Teheranit dhe theksoi se Irani do të vazhdojë të përballet me Shtetet e Bashkuara.
Ai nënvizoi se marrëdhëniet mes dy vendeve pritet të forcohen më tej në të ardhmen.
Në të njëjtën kohë, Putin shprehu shpresën për qëndrueshmërinë e popullit iranian në periudhën aktuale sfiduese.
“Shpresojmë sinqerisht që, duke u mbështetur në këtë guxim dhe dëshirë për pavarësi, populli iranian do ta kalojë këtë periudhë të vështirë sprovash nën udhëheqjen e një udhëheqësi të ri – dhe paqja do të vijë”, tha ai, sipas RIA-s, citon Al Jazeera.
