Mbrojtësi i Kombëtares së Kosovës, Ilir Krasniqi sipas të gjitha gjasave do të jetë bashkëlojtar me mesfushorin Lindon Emërllahu, te skuadra nga Ukraina, Polissya Zhytomyr.
Emërllahu pritet që gjatë kësaj jave të prezantohet te skuadra ukrainase, e cila ka siguruar shërbimet e tij nga Cluji i Rumanisë.
Megjithatë, Polissya po synon transferimin edhe të mbrojtësit Ilir Krasniqi, i cili është pjesë e ekipit tjetër nga Ukraina, Kolos.
Bëhet e ditur se klubet kanë nisur zyrtarisht negociatat dhe gjasat janë të mëdha që pas Emërllahut edhe Krasniqi të përfundojë te Polissya.
Kjo skuadër thuhet se ka ofruar 2 milionë euro për Krasniqin, i cili vlerësohet ndër mbrojtësit më të mirë të huaj në kampionat.
Krasniqi te Kolosi u transferua në vitin 2024 nga Llapi dhe me ekipin nga Ukraina ka kontratë deri në verën e vitit 2027.
25-vjeçari këtë sezon ka shënuar 1 gol në 15 paraqitje për Kolosin në të gjitha garat, ndërsa ka edhe 17 ndeshje të luajtura për Kombëtaren e Kosovës.
