Kryeministri i Kosovës, Albin Kurti, ka bërë të ditur se ka qëndruar për ngushëllime në familjen Dauti në Prekaz të Epërm, pas gjetjes së eshtrave të djalit të tyre, i cili ishte zhdukur gjatë luftës në Kosovë.
Sipas Kurtit, Sinani ishte vetëm 9 vjeç kur më 12 prill 1999 u mor nga forcat serbe dhe nuk u kthye më kurrë.
“Sinani ishte vetëm 9 vjeç kur më 12 prill 1999 u mor nga forcat serbe për të mos u kthyer kurrë më. Për fatin e tij u kuptua vetëm pas 27 vitesh”, ka shkruar Kurti.
Ai bëri të ditur se këtë të shtunë familja Dauti do të bëjë rivarrimin e eshtrave të gjetura së fundmi.
“E këtë të shtunë familja Dauti rivarros eshtrat e gjetura të djalit të tyre”, thuhet në reagim.
Kryeministri njoftoi se gjatë ditës së sotme ka qenë në këtë familje bashkë me drejtuesin e Komisionit për Persona të Zhdukur, Andin Hoti.
“Pasditen e sotme bashkë me ministrin, Andin Hoti, ishim për ngushëllime në familjen Dauti në Prekaz të Epërm të Skenderajt”, ka thënë ai.
Sipas tij, eshtrat e 9-vjeçarit janë gjetur në varrezat e fshatit Suhodoll të Mitrovicës.
“Eshtrat e tij u gjetën së fundmi në varrezat e fshatit Suhodoll të Mitrovicës”, ka shtuar Kurti.
Kreu i qeverisë theksoi se dhimbja e familjes Dauti është dhimbje e të gjithë shoqërisë.
“Dhimbja e kësaj familjeje nuk është vetëm e tyre, është plagë e hapur e gjithë popullit tonë”, është shprehur ai.
Ai e cilësoi rivarrimin si një akt të rëndë emocional, por të domosdoshëm për dinjitetin njerëzor.
“Rivarrosja e eshtrave të Sinanit, është një akt i rëndë emocional, por edhe një akt i vonuar i dinjitetit njerëzor. Sepse çdo i rënë për liri meriton emër, vend dhe kujtim të përhershëm”, ka theksuar Kurti.
Në fund, ai bëri thirrje për drejtësi dhe zbardhje të fatit të personave të zhdukur.
“Pa drejtësi nuk ka paqe të plotë dhe pa të vërtetën nuk ka pajtim të qëndrueshëm”, ka përfunduar ai.
