Partia Demokracia e Re e Kyriakos Mitsotakis është fituesja e zgjedhjeve parlamentare që u mbajtën këtë të diel në Greqi.
Nga të dhënat e paraprake zyrtare të bëra publike nga Ministria e Brendshme greke, rezulton se partia e kryeministrit Kyriakos Mitsotakis ka marrë nga 41 përqind të votave duke siguruar plot 146 vende në parlamentin e ri.
Rezultati ishte një disfatë për SYRIZA-n e ish-kryeministri Alexis Tsipras, e cila u rendit e dyta me 20 përqind më pak vota se Demokracia e Re.
Ajo siguroi vetëm 20% të votave të përkthyera në 71 mandate deputetësh.
Në vend të tretë u rendit PASOK-u i Nikos Androulakis, ndërsa në parlament futen edhe dy parti të tjera më vogla.
Bazuar në këto rezultate, mediat greke raportojnë se kryeministrit Mitsotakis pavarësisht kësaj fitoreje do t’i duhet një koalicion për të qeverisur.
Në një dalje për mediat rreth 3 orë pas mbylljes së kutive, kryeministri Kyriakos Mitsotakis, teksa shpalli fitoren në zgjedhje, tha se qytetarët me votën e tyre kërkuan që Demokracia e Re të qeverisë e vetme, duke paralajmëruar se vendi mund të shkojë drejt një raundi të dytë votimesh.
21.467 qendrat e votimit në të gjithë vendin u hapën në orën 07:00 të mëngjesit me orën lokale dhe u mbyllën në orën 19:00 të mbrëmjes. Në votime ishin ftuar të merrnin pjesë 9.8 milionë grekë me të drejtë vote, ndërsa e ushtruan këtë të drejtë afro 58 përqind e tyre./Tv Klan/
