Po gjobiten për të katërtën herë.
Kompania Kosovare për Distribuim me Energjinë Elektrike në Kosovë edhe këtë të premte mori dënim për parregullsi në njehsorët elektrikë.
Këtë herë, ndëshkimi u kushtoi plot 35 mijë euro.
Lajmin e dhanë Ministria e Industrisë, Ndërmarrësisë dhe Tregtisë.
“Sipas rezultateve të verifikimit, në 6 raste është konstatuar se njehsorët elektrikë kishin afat të skaduar të verifikimit, ndërsa në 6 raste të tjera janë evidentuar devijime në orë dhe datë. Bazuar në këto gjetje, Inspektorati Qendror i Mbikëqyrjes së Tregut (IQMT) ka shqiptuar gjobë ndaj KEDS-it në vlerë prej 35 mijë eurosh”.
Këto gjoba, sipas anëtarit të Lidhjes Demokratike të Kosovës, Visar Azemi, i cili kishte raportuar disa raste, janë vetëm simbolike.
“Ministria shqipton gjoba simbolike për me kamufluar këtë problem. Prandaj mua nuk më duket që janë veprime që duan me zbardhë këtë skandal, por janë tentime që pak a shumë po e fshehin skandalin”.
I njëjti thotë se brenga më e madhe në këtë mes është kompensimi i qytetarëve dhe fillimi i hetimeve për këtë rast.
“Unë dje vizitova një kompleks ndërtesash, i pashë që shumica e njehsorëve elektrikë ishin ndërruar, ishin zëvendësuar me disa njehsorë kinez që nuk i kisha pa më herët në treg. Çështja kryesore është se a kanë ditur ata banorë dhe a kanë njohuri se sa para u ka vjedhur KEDS, pra ke shku i ke ndërruar njehsorët, i ke fshehë provat”.
Njohësit e fushës së energjisë konsiderojnë se këto parregullsi të evidentuara, nuk janë bërë nga KEDS për të përfituar.
“Unë nuk besoj që këto anomali në njehsorët e energjisë elektrike janë një proces sistematik i shtyrë nga KEDS-i për qëllime të përfitimeve të ndryshme. Për shkak se çdo devijim që vjen nga sasia energjisë së konsumuar, ajo shumë lehtë mund të verifikohet nga KOST, për shkak se e gjithë energjia elektrike që konsumohet nga konsumatorët e Republikës së Kosovës dhe e faturon KEDS, ajo mund të verifikohet shumë lehtë nga KOST për shkak se ajo e ka nën kontroll të gjithë konsumimin e energjisë elektrike në Kosovë”, thotë profesori i energjetikës, Adhurim Haxhimusa.
KEDS-i fillimisht është ndëshkuar me 6 mijë euro për dy njehsorë me afat të skaduar, e më pas edhe me 30.000 euro dhe të tretën herë me 90 mijë euro.
Gjatë ditës, televizioni ka tentuar të marr një përgjigje edhe nga KEDS, por të njëjtit nuk ishin të qasshëm.
