Është i pari që do të kthente shishet e plastikës në rast të rimbursimit.
Por qytetari nga Prishtina, ende nuk mund ta bëjë një gjë të tillë.
Kjo pasi ka kohë që Ministria e Mjedisit kishte paralajmëruar këtë nismë, por e njëjta ende nuk është vënë në praktikë.
Pensionisti Sali Hajdari thotë se do të ishte i kënaqur nëse do mund të përfitonte nga ky proces.
“Me kanë që i bëjnë ato si po më tregojnë vëllezërit dhe motra me i dërgua te vendi, po këtu ku, këtu e pijë për dritare e hedhin. Po i kisha kthyer se 120 euro e kam pensionin bilës pak e kisha pas një fitim të vogël”.
Por, njëjtë nuk mendon një qytetar tjetër.
“Jo nuk i kisha ruajtur, se si të shkojnë i hedh në mbeturina menjëherë”, thotë Hasim Canolli.
Nga organizata “Ta pastrojmë Kosovën” e quajnë për keqardhje që ky projekt nuk po zbatohet.
“Është për të ardhur keq se si një projekt i tillë nuk po gjen zbatim sepse ka qenë një projekt i mirë e i rëndësishëm sidomos kur bie fjala për kujdesin për mjedisin sepse i stimulonte qytetarët që mbetjet e tilla si janë: kanaçja, plastika dhe xhami të mos hidhen në natyrë siç ndodh rëndomë. Mirëpo, ishte një adresë që ata mund ti dorëzonin dhe atyre të ju kthehet një depozitë sado simbolikë”, deklaroi Luan Hasanaj.
Sipas tij, riciklimi i shisheve të plastikës është nevojë emergjente për mjedisin.
“Dështimi i tij, nëse mund të quajmë kështu është vërtetë lajm i keq se do të ndikojë në mos përmirësimin e gjendjes së mjedisit në Kosovë dhe mendoj se nuk ka qenë i planifikuar mirë si duket Ministria nuk i ka marrë për bazë disa kritere që janë të rëndësishme për zbatimin e një projekti të tillë. Dihet se ky lloj i aktivitetit ka nevojë për angazhim të kompanive private të cilat do të duhet të ishin zbatues të këtij projekti, të planifikoj mënyra se si ky projekt do të zbatohej, andaj po shihet që nuk është planifikuar mirë dhe nuk po shihet lëvizje”.
Se duhet kogja përkushtim për realizimin e këtij projekti e thotë profesori i mjedisit, Sami Makolli.
“Është një proces më i komplikuar se sa bërja me pagesë e qeseve të plastikës. Për shkak se ka një kosto fillestare te bizneset se si zakonisht që CD Qeveri barrën ia bartë bizneseve ka makineri të blerjes për të, e dyta është që donë më shumë kontrolle, për shkak të abuzimit, ka mundësi të abuzimit të shisheve të cilat nuk janë të regjistruara. Është procesi që detyrimisht kemi me rrjedh rreth saj nëse duam me qenë pjesë e BE”, deklaroi Makolli.
Njoftimin rreth sistemit për rimbursimin e shisheve të plastikës, qelqit apo kanaçeve të aluminit, Ministria e Mjedisit e kishte bërë në shkurt të vitit 2024.
Televizioni ka dërguar pyetje në këtë dikaster për këtë çështje, por nga të njëjtit nuk ka marr përgjigje.
