Organizata e Veteranëve të Luftës, u mobilizua të mërkurën.
Kjo meqë në mesditë këtu do të arrijë një mysafir i veçantë.
E rreth orës 13:00, mysafiri erdhi.
Është ky prefekti i Tiranës, Shkëlqim Hajdari i cili të mërkurën vizitoi Kosovën.
E më të filluar takimi, Hajdari u befasua nga veteranët.
Për të, OVL ndau një dekoratë.
“Ne kemi përzgjedhur ta nderojmë Prefektin e i Tiranës, Shkëlqim Hajdari, me këtë dekoratë, e cila do të jetë kujtim për tërë jetën. Kjo dekoratë nuk është thjesht një ngritje apo ulje. Kjo dekoratë thjesht vlerëson atë mirënjohjen, apo vlerën që ai ka dhënë, vlerat e veta, vlerat e veta që ka dhënë gjatë kohës në periudha të ndryshme. Kështu që unë edhe njëherë e falënderoj, që ka gjetur kohë me ardhur, bashkërisht me ekipin e vet, tha Hysni Gucati, kryetar i OVL-UÇK-së.
Ish-prokurori shqiptar, këtu preku edhe një nga temat që e di më së miri.
Behët fjalë për gjyqin ndaj ish-krerëve të UCK-së, që po mbahen në paraburgim në Hagë.
“Na kanë bërë krenarë, që falë qëndresës tyre stoike i kanë treguar gjithë botës që për ato akuza që ata akuzohen nuk ka asnjë provë. I gjithë aktiviteti i organizatës së veteranëve, i shoqatave patriotike dhe kulturore këtu në Kosovë, në Shqipëri, Maqedoni, në Preshevë, Malësi, nuk ka pushuar me mitingjet që janë bërë nëpër të gjithë qytetet tona kryesore”, u shpreh Hajdari.
Lirimin e tyre, Hajdari thotë se e presin gjithë shqiptarët.
“E pret një komb i tërë. Nuk e pret vetëm Kosova, po e pret Shqipëria, Maqedonia, shqiptarët që janë në Evropë, shqiptarët që janë në Amerikë. Dhjetë milionë shqiptarë presin drejtësi për çlirimtarët. Kurrë nuk mund të ndodhë të barazohet viktima me agresorin”, tha prefekti i Tiranës.
Mirënjohja në OVL, nuk ishte e vetmja që Hajdari e mori në Prishtinë të mërkurën.
Një e tillë, iu nda edhe në një kolegj privat.
“Çelësi student pedagog është shumë i rëndësishëm, bëhuni promotorra për të kthyer dinjitetin e pedagogëve i cili mungon në universitet shqiptare, edhe në shkollat e mesme ka rënë respekti për mësuesit, edukatorët dhe pedagogët. Merreni me forcë ju që jeni sa shqiptar aq edhe perëndimorë”, u shpreh ai.
E të mërkurën, prefekti i Tiranës, Shkëlqim Hajdari vizitoi edhe Komunën e Prishtinës.
