Presidentja e Kosovës, Vjosa Osmani, ka vizituar komunën e Dragashit, ku është pritur nga kryetari i komunës, Bexhet Xheladini. Gjatë takimit, sipas Presidencës, u diskutua për projektet zhvillimore dhe potencialin që kjo komunë ka në fushën e ekonomisë dhe turizmit.
Duke njoftuar për vizitën, Presidentja Osmani ka thënë se Dragashi ka resurse të rëndësishme natyrore dhe kulturore, të cilat po shndërrohen në mundësi konkrete zhvillimi.
“Duke u kthyer nga Shqipëria, u ndalëm në komunën pitoreske të Dragashit. Sharri ka traditë, përkushtim dhe bukuri të jashtëzakonshme që kthehen në zhvillim ekonomik,” ka shkruar Osmani.
Ajo ka shtuar se me kryetarin Xheladini kanë diskutuar për projektet që tashmë janë duke ndikuar në përmirësimin e jetës së qytetarëve.
“Me kryetarin Bexhet Xheladini diskutuam për projektet që po e ndryshojnë jetën e qytetarëve dhe potencialin e madh që ka kjo komunë. E falënderoj për mikpritjen e tij, së bashku me anëtarët e qeverisë komunale dhe të kuvendit komunal, të cilët përfaqësojnë të gjitha komunitetet,” ka deklaruar Presidentja.
