Ish-presidentja e Kosovës, Vjosa Osmani ka falënderuar qytetarët për mbështetjen e dhënë në zgjedhjet e fundit, duke theksuar se rezultati i arritur nga partia e saj paraqet një motiv shtesë për të vazhduar angazhimin politik dhe institucional.
Në një mesazh drejtuar qytetarëve, mbështetësve dhe votuesve të LDK-së, Osmani shprehu mirënjohje për besimin e treguar gjatë fushatës dhe procesit zgjedhor, duke vlerësuar kontributin e secilit qytetar që mbështeti programin dhe vizionin e partisë.
Sipas saj, besimi i qytetarëve se politika mund të udhëhiqet me dinjitet, dialog dhe përgjegjësi ka qenë shtysa kryesore e angazhimit të LDK-së në këtë proces zgjedhor.
Duke komentuar zhvillimet politike pas zgjedhjeve, Osmani theksoi se angazhimi i saj mbetet i përqendruar në krijimin e institucioneve dhe tejkalimin e krizave politike, duke thënë se emri i saj nuk do të jetë pengesë për formimin e institucioneve.
“Emri im nuk ka qenë, nuk është dhe nuk do të jetë pengesë për formimin e institucioneve. I gjithë kontributi im do të jetë i orientuar drejt daljes nga kriza dhe ndërtimit të institucioneve që mbrojnë shtetin, demokracinë, Kushtetutën dhe aleancat strategjike të Kosovës”, theksoi ajo.
