Plagosjen e një pjesëtari të Policisë së Kosovës dhe sulmin ndaj disa gazetarëve në veri, Osmani i konsideroi si veprime kriminale, teksa ka bërë thirrje që autorët e këtyre krimeve të sillen urgjentisht para drejtësisë.
“Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste. Kjo duhet të refuzohet e kundërshtohet qartë nga e gjithë bota demokratike, e cila i dha goditjen më të fuqishme kësaj mendësie pikërisht në vitin 1999. Plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe kundër veprimeve për sundim të rendit e ligjit. Gjithashtu, sulmet ndaj gazetarëve përbëjnë cenim flagrant të të drejtës për informim të lirë. Autorët e këtyre krimeve, urgjentisht të sillen para drejtësisë, ndërkaq institucionet e drejtësisë duhet të veprojnë menjëherë”, ka shkruar Osmani në Facebook.
Ndërsa, më tej ka shkruar se në territorin e Republikës së Kosovës kurrë më nuk do të ketë policë dhe ushtarë të Serbisë.
“Ëndrra hegjemoniste e Serbisë nuk do të jetësohet kurrë!”, ka shkruar ajo./teve1.info/
