Kështu kanë bërë të ditur burimet e Teve1.info.
Në këtë mbledhje është diskutuar për sigurinë në vend, pas sulmeve ndaj policëve në pjesën veriore.
Ndryshe, sot ministri i Punëve të Brendshme në Kosovë, Xhelal Sveçla, tha se sulmi ndaj policëve “tashmë i faktuar, me granatë dore dhe AK-47, si një akt terrorist, është bërë me qëllim të frikësimit të zyrtarëve policorë, por edhe të të gjithë qytetarëve të Kosovës”.
Ai ka thënë se “grupe të ndryshme në tri ditët e fundit kanë realizuar katër sulme në atë zonë”.
Po ashtu edhe kryeministri, Albin Kurti tha se sulmet ndaj policisë për tre ditë rresht vijnë nga ana e territorit serb.
“Për tri ditë radhazi (13–15 prill) policët e Kosovës janë sulmuar në pikën kufitare me Serbinë. Dje dhe sot herët, një breshër plumbash dhe një granatë dore u hodhën drejt policisë sonë. Burimet tona e kanë identifikuar sulmin e djeshëm si të ardhur nga Serbia”, ka shkruar Kurti.
Për këtë sulm ka reaguar edhe Bashkimi Evropian dhe Ambasada e SHBA-së në Kosovë, të cilët dënuan dhunën ndaj policëve në veri. /teve1.info/
