Samiti i Brdo-Brijunit ndër të tjera ka për qëllim forcimin e bashkëpunimit rajonal mes vendeve të Ballkanit Perëndimor.
Por sipas presidentes së Kosovës, Vjosa Osmani, nuk pati frymë bashkëpunimi nga shteti fqinj, Serbia.
E para e shtetit, duke treguar detaje nga takimi tha se homologu i saj serb, Aleksandër Vuçiq iu drejtua samitit me ofendime dhe arrogancë.
“Sikurse dhe në takimet e tjera të Brdo Brijunit, ndoshta me një dozë më të madhe, Vuçiqi i Serbisë iu drejtua samitit me ofendime dhe arrogancë me tentimin që ta prishte takimin por arritëm në fund që ta miratojmë deklaratën e përbashkët me unanimitet. Natyrisht me çdo propagandë që Vuçiqi synonte të prezantonte para pjesëmarrëseve, ne si Republikë e Kosovës kishim argumentet tona të fuqishme, argumentet në anën e së drejtës dhe argumente që janë mbështetur e janë fuqizuar nga e drejta ndërkombëtare, ndërmjet mendimeve të gjykatës ndërkombëtare të drejtësie”, tha Osmani.
Për përplasjet verbale, foli edhe presidenti serb, Aleksandar Vuçiq.
“Imagjinoni kur Vjosa Osmani vjen dhe flet për integritetin territorial dhe mbrojtjen e integritetit territorial. Dhe pastaj barku juaj kthehet përmbys, dhe të gjithë të tjerët dëgjojnë, duke tundur kokën…Kështu që ne ia kujtuam ditët e saj të turizmit në Kombet e Bashkuara, uruam më shumë turizëm në jetën e saj dhe kaq”, tha Vuçiq.
Mirëpo, Osmani theksoi se Kosova është bashkëpunuese dhe gjithmonë e gatshme ta mbrojë sovranitetin e saj.
“Si Kosovë jemi pro bashkëpunimit rajonal, por në të njëjtën kohë do ta mbrojmë interesin tonë shtetëror, sovranitetin, integritetin tonë territorial edhe pse Vuçiq kishte ankesa për paktin tonë për marrëveshjen e përbashkët. Kosovë-Shqipëri dhe Kroaci në fushën e mbrojtjes, ai mori rikonfirmimin tonë të përbashkët që kjo shënon një bashkëpunim që ka qëllim mbrojtën tonë. Dhe përgjigja ime ishte që në tërë historinë e ekzistencës sonë si komb, ne asnjëherë nuk e kemi sulmuar e as pushtuar askënd mirëpo gjithnjë e kemi mbrojtur dhe do ta mbrojmë vetën dhe integritetin territorial”, tha Osmani.
Mes tjerash, Osmani tha se Kosova ndonëse është në linjë plotësisht me politikën e jashtme dhe të sigurisë të BE-së, ajo vazhdon të jetë nën sanksione të BE-së.
