Organizata e shpallur terroriste “Severna Brigada” dyshohet se ka publikuar sërish kërcënime me jetë ndaj zyrtarëve institucionalë në Kosovë. Rasti po hetohet nga Policia e Kosovës si vepër penale e terrorizmit, transmeton KosovaPress.
Sipas raportit 24-orësh të Policisë së Kosovës, kërcënimet janë publikuar në rrjete sociale dhe dyshohet se vijnë nga organizata e vetëquajtur “Severna Brigada”.
Rasti është regjistruar të martën, më 28 korrik, ndërsa hetimet po zhvillohen nga njësitet përkatëse të Policisë së Kosovës.
Qeveria e Kosovës e kishte shpallur “Severna Brigada” organizatë terroriste më 29 qershor 2023, së bashku me organizatën “Mbrojtja Civile”. Vendimi ishte marrë për shkak të veprimtarisë së tyre që cenonte rendin kushtetues dhe sigurinë e vendit.
Pavarësisht këtij vendimi, rasti i fundit tregon se organizata vazhdon të shfaqet në hapësirën online, duke publikuar mesazhe kërcënuese ndaj përfaqësuesve të institucioneve, ndërsa autoritetet po hetojnë origjinën e tyre dhe personat që qëndrojnë pas tyre.
