Analisti politik Selam Shkodra ka komentuar krizën institucionale në vend, duke theksuar se moszgjedhja e presidentit dhe zhvillimet e fundit politike janë rezultat i taktizimeve të partive opozitare.
Në emisionin “Këndi i Debatit” në Tëvë1, ai foli për situatën e krijuar pas shpërndarjes së Kuvendit nga presidentja dhe vendimit të Gjykatës Kushtetuese për ta pezulluar dekretin.
“Paku për ta filluar procesin e zgjedhjes së presidentit nevojiten 80 vota dhe problemi ka ndodhur kur partitë opozitare kanë tentuar të paraqiten si pjesë e procesit, por në fakt nuk kanë kontribuar në asnjë formë. Kanë taktizuar përmes pjesëmarrjes në takimet e ftuara nga kryeministri, por pa vullnet real për zgjidhje”, ka thënë Shkodra.
Ai shtoi se kjo qasje ka ndikuar drejtpërdrejt në bllokimin e procesit dhe në krijimin e një krize politike.
“Në ftesat që i ka bërë kryeministri për të negociuar për t’i dhënë vendit presidentin, është taktizuar, që i bie se është komplotuar procesi i zgjedhjes së presidentit, me qëllim që të zvarritet apo të suspendohet rezultati zgjedhor i 28 dhjetorit 2025”, ka deklaruar ai.
Sipas tij, kjo situatë ka dëmtuar funksionimin normal institucional.
“Kjo i bie që është komplikuar dhe bllokuar procesi i zgjedhjes së presidentit, me qëllim që të zvarritet apo të suspendohet rezultati zgjedhor i 28 dhjetorit 2025”, u shpreh ai.
Shkodra kritikoi edhe qasjen e subjekteve politike gjatë negociatave, duke thënë se ato nuk kanë ofruar kontribut konkret.
“Palët kanë hyrë në proces pa dhënë asgjë dhe pa marrë përgjegjësi. Madje ka pasur kërkesa që të nënshkruhen lista pa emra për kandidatë potencialë për president, gjë që tregon mungesë serioziteti në këtë proces”, ka theksuar ai.
