Prokuroria Speciale, në bashkëpunim me Policinë e Kosovës, ka arrestuar të martën tre persona të dyshuar, me inicialet A.A., S.D. dhe B.K., nën dyshimin për kryerjen e një sërë veprash të rënda penale.
Sipas njoftimit, të dyshuarit përfshihen në gjithsej shtatë vepra penale, përfshirë pjesëmarrje ose organizim të grupit kriminal të organizuar, financim të terrorizmit, shpëlarje të parave, mashtrim, detyrim, si dhe veprat që lidhen me armë dhe narkotikë.
Në këtë aksion, Policia e Kosovës ka bërë të ditur se janë përfshirë edhe autoritetet ndërkombëtare, përfshirë FBI-në dhe Policinë Mbretërore të Kanadasë (RCMP), të cilat kanë qenë të pranishme në terren gjatë zhvillimit të operacionit.
Po ashtu, aksioni është mbështetur edhe nga zyra OPDAT e Departamentit Amerikan të Drejtësisë, në kuadër të bashkëpunimit ndërkombëtar në luftën kundër krimit të organizuar.
Me vendim të prokurorit special, të dyshuarve u është caktuar masa e ndalimit prej 48 orësh, ndërsa hetimet për rastin po vazhdojnë.
