Pas aktvendimit të sotëm të Departamentit për Çështje Administrative të Gjykatës Komerciale, i cili pezulloi njoftimin e Zyrës së Rregullatorit për Energji (ZRrE) për liberalizimin e tregut të energjisë dhe caktoi masën e sigurisë deri në një vendim përfundimtar, Oda Ekonomike Amerikane në Kosovë (OEAK) ka reaguar ashpër ndaj zhvillimeve, duke kërkuar shfuqizimin e menjëhershëm të vendimit të ZRrE-së.
Në një reagim drejtuar mediave, OEAK thekson se ky aktgjykim, por edhe vendimet e ngjashme të javëve të kaluara, konfirmojnë shqetësimet e komunitetit të biznesit për mënyrën si është trajtuar procesi i liberalizimit.
“Pasiguria juridike e krijuar muajve të fundit ka shkaktuar konfuzion të jashtëzakonshëm në mesin e bizneseve, duke minuar parashikueshmërinë rregullative dhe duke cenuar planifikimin operativ”, thuhet në deklaratën e OEAK.
Sipas tyre, reformat në sektorë kritikë si energjia duhet të ndërtohen mbi transparencë, siguri ligjore dhe barazi në trajtim për të gjithë aktorët ekonomikë.
“Oda Ekonomike Amerikane bën thirrje për një dialog gjithëpërfshirës ndërmjet të gjithë hisedarëve përkatës, përfshirë Qeverinë e Kosovës dhe komunitetin e biznesit, për të siguruar që çdo hap i ardhshëm drejt liberalizimit të tregut të bazohet në qartësi ligjore, procedura të drejta dhe një angazhim për drejtësi ekonomike.”
Ky është rasti i radhës që vendimi i ZRrE-së për liberalizimin e tregut të energjisë pezullohet nga gjykatat, ndërsa shtohen thirrjet nga akterë ekonomikë për rishikim të tërësishëm të procesit.
