Pas 22 ditësh u mblodhën në të njëjtin vend.
E arsyeja edhe këtë të marte ishte e njëjtë.
Në këtë formë, këta qytetarë të Klinës, u mblodhën për të protestuar sërish në rrugën “Sadik Rama”.
Shkak për këtë, ishte mos-asfaltimi i kësaj rruge, ani pse një gjë e tillë thonë se u ishte premtuar.
“Kjo gjendje është qe dy muaj e gjysmë. Kompania kontraktuese e ka bërë nënshkrimin në 29.12.2025 e afati kohor ka qenë veç 60 ditë. Unë nuk e di sa duhet me prit na për këtë rrugë me u shtruar. Ministria herën e kaluar na kanë thënë që për një javë ka me u asfaltu. Na kanë dëmtuar në biznese, pluhur i madh nuk mundemi me dal gjendja është e mjerueshme veç e kanë qel e kanë gërrye. Tani s’po di as vet as nuk na kanë jap më kohë, ministria tha për një javë kryhet”, ka thënë Maloku.
Protestuesit thonë se mungesa e asfaltit, po ua dëmton edhe veturat.
“Gomat për ditë dëmtohen po e shihni edhe vet”, u shpreh banori.
Kjo gjendje, probleme të mëdha po u shkakton edhe bizneseve.
“Në kamionë më së shumti, dëmtohen pluhur e gjithçka”, ka thënë pronari i një biznesi.
“Unë e kam me mobile nuk je në gjendje që punon se krejt pluhuri hyn në garnitura e në dhoma të gjumit nuk ke qysh e shet”, u shpreh pronari i një mobilerie.
“No koment unë skam shkollë të kryer me ju tregu juve se çka ka kjo nëse nuk e sheh shteti ose qytetarët e thjeshtë”, theksoj Morina.
E njëri nga protestuesit kishte kërkesë për kryetarin e Klinës.
“Kështu që është mirë kryetari me i bë presion më shumë jo me mbet në Komunë aty si bletë e lekne”, ka thënë edhe nje banorë tjetër.
Por, komunarët në anën tjetër thonë se kjo rrugë nuk është përgjegjësi e tyre.
“Në proces verbal por edhe në takim na është thënë se operatori ka bërë kërkesë për punë shtesë te mbulimi i gropave, dhe sipas tyre procedurat që i lëvizin duhet të pranoj atë punën shtesë, pra duhet formuar komisioni për analizë nga sekretari permanent i ministrisë. Kështu që sipas operatori dhe organit mbikëqyrës thonë se kur bëhet pranimi i punëve shtesë atëherë ne vazhdojmë”, u shpreh Berisha.
Për këtë hall të qytetarëve të Klinës, Tëvë1 ka provuar të marrë një përgjigje edhe nga Ministria e Infrastrukturës.
Por, këta të fundit nuk kthyen përgjigje të martën.
Ndërsa me 20 prill, përmes një përgjigje kishin premtuar se punimet do të përfundojnë brenda një jave.
