Një person ka pësuar lëndime trupore pasi dyshohet se ka rënë nga një shtyllë elektrike në Komunën e Klinës.
Sipas zëdhënësit të Policisë Rajonale në Pejë, Driton Rugova, fillimisht Policia është njoftuar nga Qendra Kryesore e Mjekësisë Familjare (QKMF) në Klinë për një person të lënduar.
“Sot rreth orës 13:40, Policia është njoftuar nga QKMF-Klinë se një person është i lënduar. Policia menjëherë ka dalë në vendin e ngjarjes”, ka deklaruar Rugova.
Ai ka theksuar se në vendngjarje është konstatuar se personi i lënduar ka rënë nga një shtyllë elektrike.
“Atje është kuptuar se personi i lënduar ka rënë nga shtylla elektrike”, ka thënë ai.
Rugova bëri të ditur se i lënduari është dërguar për trajtim mjekësor në Spitalin Rajonal të Pejës.
“I njëjti është dërguar në Spitalin Rajonal në Pejë për trajtim mjekësor”, u shpreh ai.
Policia ka bërë të ditur se rasti është duke u hetuar për të sqaruar rrethanat e plota të ngjarjes.
